Прв пат во историјата сонда се спушта на комета

Мал чекор за една вселенска сонда, голем за човештвото. Во секој момент се очекува потврда дали лендерот „Фили“ ќе ја допре површината на кометата 67П. Исходот е крајно неизвесен поради минималната гравитација – ако не се закачи успешно со харпуни и завртки, може да се одбие и да одлета во вселената.

„Се е програмирано, не знаеме што ќе најде модулот на површината. Ни треба малку среќа за овој маневар“, рече д-р Паоло Фери од Европската вселенска агенција.

Фили рано изутрината се одвои од матичниот брод Розета и го почна спуштањето на мисија што треба да фрли светлина на тајните на замрзнатото небесно тело од почетоците на соларниот систем.