Електронски систем за наплата на патарините за 18 месеци
Вредноста на инвестицијата е 18,7 милиони евра, од кои 15 се обезбедени од Европската банка за обнова и развој, а останатиот дел е од државниот буџет...
За 18 месеци земјава ќе добие електронски ситем за наплата на патарините што ќе овозможи брз проток на возилата на Коридорот 10. Ќе ги модернизира турската компанија „Аселсан“.
Вредноста на инвестицијата е 18,7 милиони евра, од кои 15 се обезбедени од Европската банка за обнова и развој, а останатиот дел е од државниот буџет.
„Потпишувањето на договорот е уште еден исчекор на Владата во насока на вложување во транспортната инфраструктура и тоа токму на најзначајната транспортна артерија низ Македонија - Коридорот 10 низ кој минува 70 проценти од вкупната трговија на стоки низ државава“, рече по потпишувањето на договорот вицепремиерот и министер за финансии Зоран Ставрески.
Според министерот за транспорт и врски Миле Јанакиески, и покрај тоа што ќе се воведе автоматизран начин на наплата со целосно исклучување на човечкиот фактор ниту еден вработен во Јавното претпријатие нема да остане без работа. Вработените воопшто нема да бидат вклучени во наплатата на патарините затоа што самиот систем не се базира на кеш. Смарт картичките ќе се полнат на наплатни пунктови во близина на патарините и сигурно дека ќе има вклучени лица во сервис, наведе Јанакиески.
Според потпретседателот на „Асасан“, системот кој треба да го спроведат е веќе применето решение во пракса за автоматска наплата на патарини и се користи повеќе од 15 години во услови на густ сообраќај во Турција.