Наместо победа за прво место, несреќен пораз на Вардар

Уште еден спектакуларен меч на Вардар во Л Ш, против минатогодишниот учесник во Фајнал 4 Веспрем. Околу 6.000 присутни присуствуваа на најголемата ракометна драма досега во “Јане Сандански“ која на крајот резултира со несреќен пораз на Вардарци. Унгарците почнаа во голем стил, со цврста одбрана и брза транзиција во играта за 10 минути поведоа со 7 : 3, предводени од Зајц и Угалде кои ги казнуваа техничките грешки на домаќинот. Кон средината на полувремето вардарци ги поврзаа линиите и направија серија за израмнување на 8:8, но потоа Веспрем одново ја презеде контролата и го доби првиот дел со 13:11.

Многу поквалитетно беше по паузата, Вардар со постојан притисок најпрвин успеаја да израмнат а веднаш потоа и да поведат со 18:17 на половина од вториот дел. Во 48 минута по атракцијата на Душебаев и Карачиќ имаа и 21:19, но дозволија гостите со серија од 3 гола да се вратат во водство. Вардар возврати преку Брумен и Карачиќ за гол предност, а решавачкиот момент се случи на 80 секунди пред крајот. Миклер го одбрани пеналот на Брумен и наместо два предност за Вардар, во последната минута Веспрем постигна два гола преку Родригез и Илиќ за минимална победа 24:23 со која се зацврсти на лидерското место со 10 бода, 3 повеќе од Вардар. Карачиќ со 8 гола беше најефикасен на натпреварот, а кај гостите Илиќ постигна 6 погодоци.