Свечена заклетва на 44 нови волонтери од Мировниот корпус на САД

Мировниот корпус не е создаден како инструмент на дипломатијата, пропаганда или пак идеолошки конфликт туку да им овозможи на американците да имаат поголема одговорност и учество во развојот и мирот во светот - порачал Претседателот Кенеди уште пред 53 години кога го формирал. Има три цели - да им помогне на луѓето да разменат знаења и искуства, на земјите домаќини да имаат подобро разбиорање за американскиот народ, а на американците да стекнат подобро разбирање за лугето од различни земји.

„Заминуваат во нивните нови места на живеење за да почнат нов живот како наставници по англиски јазик и волонтери што ќе работат на развојот на заедниците. Нивната работа ќе ги поддржува националните приоритети на министерствата за образование и наука, за локална самоуправа и за труд и социјална политика“, рече Кетлин Кори, директор на Мировниот корпус.

Ова според Амбасадорот на САД во земјава е уште еден пример за зајакнатото партнерство мегу американскиот и македонскиот народ.

„Американците веруваат во моќта на човечките капацитети да ги менуваат работите на подобро. И овие волонтери доагаат во Македонија со таква верба“, рече Пол Волерс, амбасадор на САД во Република Македонија.

Од сите вредности кон кои се стреми човекот најпосакуван но и најтешко остварлив е мирот се обрати и преседателот Ѓорге Иванов. Се заблагодари на сите генерации волонтери на Мировниот корпус.

„Од мирот зависи економијата, развојот, планирањето на нашата иднина и иднината на нашите деца. Но мирот не е униформен ниту ултимативен, мирот се гради преку дијалог, почитување и прифаќање на различноста“, рече Ѓорге Иванов, претседател на Република Македонија.

Како дел од обуката волонтерите интензивно ги изучуваа македонскиот јазик и култура, а оние распоредени во западниот дел од Македонија и албанскиот.

Лидија Чакар