Нов блесок на Вардар за враќање на победносниот од

Во еден од најдобрите натпревари во Лигата на шампионите сезонава, Вардар по вторпат славеше над Цеље, овојпат со 34 : 32.  Во исклучително атрактивна игра на двете страни со спектакуларни моменти и луцидни акции, Вардарци иако соочени со неколкумина повредени ракометари одиграа во голем стил. Почнаа со двата гола на Карачиќ и Дибиров во првите 50 секунди игра, а по 5 минути водеа со 5 : 2. Но, најтрофејниот словенечки клуб кој во голем стил го совлада Рајн некар претходната рунда, го прифати предизвикот и првпат израмни на 5 : 5. Предводен од Слишковиќ и Зарабец имаше и на двапати водство од гол разлика. Но, по негативата 7 : 8 со серија од три гола на Чипурин, Брумен и Терзиќ, Вардар возврати за 10 : 8. Гостите парираа успешно и успеваа дури 7 пати да израмнат, последен пат на 12 : 12. Следуваше нова серија од 3 гола за враќање на предноста, а шестилјадната публика во „Јане Сандански“ уживаше во “гол шоуто“ во првото полувреме, по кое Вардар замина со предност од 19 : 17.

Уште порешително тргнаа по паузата и за 6 минути направија 22 : 18. Гостите се трудеа и вратија на двапати на само гол разлика. Тогаш на сцена стапи Горбок со 5 погодоци во вториот дел, придружуван од Карачиќ и Дибиров и сигурниот Штербик меѓу стативите, па Вардар во последните 10 минути влезе со 32 : 27. Разликата успешно ја одржуваа до крајот, а упорните словенци успеаја само да го ублажат поразот на 34 : 32. Најефикасен кај Вардар беше Дибиров со 7 гола, Карачиќ постигна 6, а со гол помалку завршија Тоскиќ и Горбок. Во редовите на Цеље Слишковиќ најзабележителен со 9 гола, а Зарабец постигна 6. Во пресрет на гостувањето кај Чеховски Медведи следниот викенд, Вардар се зацврсти на втората позиција со 9 бода, 5 помалку од Веспрем.