Се шири гласот за ХАЕ

Кај нас има само 17 болни, но лекот за ХАЕ- која е ретка болест се уште не е достапен во Македонија. Се манифестира со отоци на лицето, а смртоносна е ако отокот се јави на грлото.

Наташа Јовановска е една од оние кои се соочуваат со херидитарен ангиоедем. Лекот го набавува од соседните земји. Вели дека работи и на неколку места за да ја плати скапата терапија.

„Постои лек за оваа болест. Чини 600 евра, меѓутоа во нашава земја не е достапен. Инаку на годишно ниво, 17 пациенти би биле пресреќни со износот за еден трособен стан- околу 100.000 евра би ни биле доволни“, вели Наташа Јовановска, претседател на ХАЕ Македонија.

Едукативниот ХАЕ караван кој изминативе месец и половина се релизираше во седум градови низ Македонија ги запозна лекарите од примарната заштита како да ја препознаат болеста и како да се идентификуваат новите потенцијални пациенти. Денеска поддршка за ова ретко заболување дадоа и нашите познати спортисти.

„Ние кои не знаеме и немаме такви болести, не сме свесни додека не видиме вакви случаи“, вели ракометниот тренер Индира Кастратовиќ.

„Треба да бидеме сложни и меѓу себе да си помагаме. Хуманоста не прави поголеми“, смета кајакарот Атанас Николовски.

Во земјите од Европа повеќе од 30 години болеста се третира со шест терапии. Од здружението „ХАЕ Македонија“ се надеваат дека со ваквите манифестации ќе ги разбудат и надлежните институции без чија помош потребните лекови и натаму ќе бидат недостапни во земјава. 

Сунчица Николовска