Коби со нови рекорди за Лејкерси, Мемфис и Голден Стејт за превласт на западот

Кошаркарите на ЛА Лејкерс го совладаа Торонто со 129 : 122 дури по продолжението со што ја забележаа само 4 победа годинава. Кај домашните седуммина имаа двоцифрени поени инспирирани од ноќта за паметење на Коби Брајант, кој го оствари својот 20 “трипл дабл“ во кариерата со 31 поен, 11 скокови и 12 асистенции. Со 36 години и 99 дена стана највозрасниот во лигата со над 30 поени 10 скокови и асистенции, истовремено и единствениот во историјата со најмалку 30.000 поени и над 6.000 асистенции. Кај Торонто најдобар беше Кајл Ловри со 29 поени. Најдобриот тим на истокот го претрпе вториот пораз едноподруго, но сеуште е лидер со 13 – 4 во својата конференција.

Мајами славеше во Њујорк со 86 : 79 во меч кој го означи враќањето на двете главни звезди по паузата поради повреди. Двејн Вејд имаше 27 поени и по 5 скокови и асистенции кај тројниот шампион кој има скор од 9 - 7, а Кармело Ентони постигна 31 поен и 8 асистенции кај “Никс“ кои се при дното со 4 - 13.

Шампионот Сан Антонио имаше лесна задача на гостувањето во Бостон, од каде се враќа со убедливи 111 : 89 за нивна 12 победа. Дени Грин беше најзабележителен со 18 поени и 6 освоени топки, а кај домаќинот Џеф Грин постигна 16 поени. Серијата победи ја продолжува лидерскиот тандем на западот, Мемфис во Сакраменто 97 : 85 со 22 поени и 12 скока на Зек Рендолф за учинок од 15 – 2. Голден Стејт ги следи во чекор со својата 14 победа сезонава на гостувањето во Детроит со 104 : 93 предводени од Стивен КАри со 16 поени и 10 асистенции. Портланд дојде до 13 победа со 107 : 93 против Минесота, со уште едно ол стар издание на ЛаМаркус Олдриџ со 26 поени и 15 скокови. Орландо се враќа од Феникс со 93 : 90 во меч во кој Трој Харис постигна 21 поен и 8 скокови, а Чикаго се радуваше во Бруклин со 102 : 84 со 25 поени и 13 скокови на Пау Гасол, со која се меѓу триото најдобри на истокот со 13 победи и 6 порази.