Коу истрча на патеката за претседател на ИААФ

Себастијан Коу ги открива првите поединости од својата кампања за избор на претседател на Светската атлетска федерација. Таа главно ќе се базира на  трансформација на атлетскиот календар и на засилено привлекување на младите во овој спорт.

Во моментов тој е потпретседател на ИААФ со желба во 2015 година да го наследи 80-годишниот Сенегалец, Ламин Дијак кој најави повлекување од претседателската функција.Неговиот план е да ја зголеми привлечноста на атлетиката во светот кој брзо се менува.

„Многу работи внатре и надвор од нашиот спорт и нашиот календар делуваат неповрзано, нема приказна и битен „лепак“ за градење на возбудливи, лојални и страсни атлетски следбеници. Потребни ни се повеќе иновации, особено  како на светот подобро да му го проектираме и презентираме нашиот спорт.“- вели Себастијан Коу.

Врз четири клучни се темели програмата на Коу.

1.      Реформирање на светскиот атлетски календар и носење на атлетските натпреварувања  во центрите на градовите.

2.      Максимирање на комерцијалниот растеж и фокусирање на ангажман на младите.

3.      Зголемување на средствата за анти-допинг.

4.      Менување на внатрешната структура на ИААФ и давање на поголема гласност на атлетиката.

Себастијан Коу е 58-годишен Британец, еден од најдобрите тркачи на средни патеки во атлетската историја, светски рекордер на 800 метри и двоен олимписки шампион на 1500 метри на Игрите во Москва во 1980-та и во Лос Анџелес во 1984 година. Тој беше претседател на Организациониот одбор на Олимписките игри во Лондон во 2012 година.