Акција „Чекан“: Уапсени 15 лица од Гостивар дел од организирана криминална група

Полицијата откри нов случај на организиран криминал. 19 члена група од Гостивар шест години тероризирала сограѓани. Давале пари под лихва со високи камати и направиле серија финансиски малверзации преку фиктивни договори.

Во акцијата што ја спроведе МВР под оперативното име „Чекан“ уапсени се 15 од осомничените, а четворица не се достапни за полцијата.

„Мотивот на криминалната група бил стекнување противправна имотна корист од извршените кривични дела, а така стекнатата имотна корист ја пуштале во легалниот платен промет, за што користеле голем број сопствени фирми, банкарски сметки, вложувајќи во недвижности и во превозни средства, стекнување недвижен имот, како и давање незаконски позајмици на физички и правни лица, притоа пресметувајќи им високи-лихварски месечни камати. За враќањето на позајмиците бил вршен притисок при што користени се сериозни вербални закани и физички напади врз оштетените“, изјави помошник министерот за односи со јавност на МВР, Иво Котевски.

Организаторите на криминалната група со повеќе лица од Гостивар, меѓу кои и сопственици на фирми, стапувале во должничко доверителски односи давајќи им различни суми на девизни парични средства како позајмици со лихварски камати од 8-20 проценти месечно.

Кривично пријавените лица во текот на денов, соопшти МВР, ќе бидат спроведени до надлежниот судија на претходна постапка при Основниот Суд Скопје 1 Скопје.