Почнува изградбата на новиот Клинички центар

Почнува изградбата на новиот Клинички центар ,,Мајка Тереза”кој ќе биде завршен за три години. Камен темелникот ќе биде поставен пред старата  зграда на Клиниката за гинекологија и акушерство. Целиот проект ќе чини околу 70 милиони евра , а парите се обезбедени од Банката на Советот на Европа.

Новиот објект  ќе биде изграден на местото на старата зграда на Универзитетската клиника за гинекологија, чие  уривање е предвидено да трае три месеци. Објектот од едната страна ќе биде поврзан  со постојната зграда на хирургија ,а од  другата   со Клиниката за гинекологија, како и  со Клиниката за онкологија.

Во објектот ќе бидат сместени сите клиники освен Клиниката за инфективни болести која ќе биде одделена и сместена во сопствената зграда, Клиниката за детски болести, кон која ќе се спои Клиниката за детска хирургија, и Стоматологија и Максилофацијална хирургија кои ќе останат во постојниот објект. Сите други клиники ќе бидат во новиот комплекс.  Некои од постојните објекти  нема да се уриваат и ќе продолжат да се користат за други намени.