Рома, Сити, ЦСКА, Спортинг или Шалке во осминафиналето!

Двајца осминафиналисти се бараат вечер, другите натпревари од шестото коло во Лигата на шампионите во сегментот Е – Х ќе решаваат за продолжување во УЕФА Европа лигата или ќе бидат за престиж.

Во групата Е, Баерн го обезбеди првото место и ќе игра за високото реноме што не и одговара на ЦСКА Москва на којашто за втората позиција и е потребна победа во Минхен, но и Рома дома да не го совлада Манчестер Сити.

Од неколкуте варијанти во пресрет на пресметката на Олимпико, најсигурна и за двете екипи за пласман во осминафиналето е победата. Во случај на реми ќе зависат од Баерн. Преносот од натпреварот Рома - Манчестер Сити ќе биде на МРТ1 во 20.45, како главна содржина во емисијата посветена на Лигата на шампионите којашто ќе почне половина час порано.

Во Ф конкуренцијата дилемите се кој ќе заврши на привилигираната прва позиција и кој ќе биде трет. За да остане на лидерското место, на Пари Сен Жермен му е доволно и да не загуби од Барселона на Камп Ноу.

И Ајакс со најмалку реми дома противАпоел ќе го задржи третото место и ќе презими во Европа.   

Челзи е најдобар во групата Г без разлика на дуелот со Спортинг. Португалците се под имератив да освојат бод на Стемфорд Бриџ за да не ги интересира резултатот од дуелот Марибор и Шалке по којшто Агим Ибраими и словенечкиот првак можат да продолжат во Европа лигата само ако триумфираат.

Најважното во конкуренцијата Х е оддамна дефинирано, Порто е прв, Шахтјор втор пред меѓусебната пресметка на Драгао. Атлетик ќе се приклучи во шеснаестинафиналето на УЕФА лигата и доколку не загуби во Билбао од Бате Борисов.