Возбудлива пролет во УЕФА Европа лигата

Шеснаестинафиналниот состав најавувана возбудлива пролет во УЕФА Европа лигата, дополнета со податокот дека победникот следната сезона ќе игра во Лигата на шампионите. Меѓу 32-те екипи има шест некогашни европски прваци, пет коишто ги освојувалеи  двете натпреварувања и уште 10 коишто триумфирале во Купот или во УЕФА лигата.

Актуелниот победник Севилја, потоа Вилјареал, Торино, Генгамп, Јанг Бојс, Волфсбург, Бриж, Дњипро, Спарта Прага и Алборг вчеравечер по последното коло по групи им се придружија на Бешикташ, Салцбург, Динамо Москва, Интер, Феенорд, Евертон, Наполи, Динамо Киев, Фиорентина, Легија, Тотенхем, Селтик, ПСВ Ајндховен и на Трабзон во нокаут фазата, во којшато ќе се приклучат и треопласираните од елитното натпреварување Олимпијакос, Спортинг, Атлетик Билбао, Зенит, Андерлехт, Ајакс, Ливерпул и Рома.

Сулејманов кој од јануари ќе почне да го одработува договорот со Јанг Бојс, на пролет ќе биде единствениот македонски фудбалер во УЕФА Европа лигата, затоа што Муарем и Карабах не го совладаа Интер. Нерешените 0:0 не беа доволни за нокаут рунда којашто и претходно беше недостижна за Адеми, кој со Динамо во Загреб го совлада Селтик со 4:3, како и  за Абдурахими без разлика што неговиот Локерен како гостин беше подобар од Металист со 1:0.

Шеснастинафиналните дуели ќе се одиграат на 19-ти и на 26-ти февруари следната година. Извлекувањето на двојките ќе биде в понеделник, кога судбината ќе ги спои и осминафиналните противници во Лигата на шампионите.