Заложничка драма во Сиднеј

Вооружен напаѓач веќе осум часа држи околу 30-тина заложници во центарот на Сиднеј. Полицијата го блокираше целосно тој дел од градот во кој се наоѓаат државни институции и седишта на голем број компании, а евакуиран е и сиднејскиот плоштад Мартин.

 

Кафе-продавницата за чоколади Лонт е опколена од неколку стотини полицајци. Преку прозорците од кафулето се гледаат лица на престрашени луѓе и поставено црно знаме со арапски букви. Очевидци тврдат дека на знамето пишувало „Нема Бог до Алах, Мухамед е божји гласник“.

 

 

Прво излегле тројца мажи, по шест часа од почетокот на драмата, а час подоцна со трчање излегле и три жени. Не е познато дали избегале или биле ослободени од напаѓачот.