Македонија останува со воено присуство во Авганистан

Македонија ќе биде дел од новата мисија  во Авганистан „Решителна поддршка“. 18 штабни офицери ќе бидат распоредени во командните структури, а 20 припадници на АРМ ќе се грижат за обезбедување на штабот на мисијата во Кабул.

„Со продолжување на учеството во оваа мисија,покажуваме и докажуваме дека Република Македонија и АРМ ги исполнуваат сите критериуми што се потребни за да бидеме дел од Алијансата во борбени мисии и во други мировни мисии“, рече во Собранието министерот за одбрана Зоран Јолевски.

Во државава постои политички и граѓански консензус за нашето евроатлантско интегрирање. Во сите мисии каде што учествуваме оценките за обученоста и професионализмот се позитивни, вели Павле Трајанов, но не треба да дозволиме критериумите за старт на преговорите за членство во Унијата, да се пресликаат и за членството во НАТО.

„Треба да направиме се одредени критериуми што се вклучени во извештајот на Европската комисија за напредокот на Македонија,да не се префрлаат како обврски и за нашето членство во НАТО“, смета пратеникот Павле Трајанов.

Учеството во пост ИСАФ мисијата е ново поглавје во нашата историја, потенцира Емил Димитриев. Уште еден доказ за угледот на Армијата и довербата на сојузниците е фактот што половина од контингентот ќе биде дел од командата на мисијата на НАТО.

Македонија во мисиите предводени од Алијансата учествува 12 години.

Милчо Велески