Ставрески: Плаќањето на придонеси за хонорари- добра и правична мерка

Добра и правична мерка - вели вицепремиерот Ставрески за плаќањето придонеси за хонорарците која ќе стартува од први јануари. Нема причина шивачите и рударите кои примаат по 12.000 денари да плаќаат придонеси, а оние кои земаат хонорар и до 50.000 да не плаќаат придонеси, вели тој.

„Тоа е добра мерка која ќе обезбеди поголема социјална заштита за луѓето кои примаат хонорари да влезат во системот на здравствена заштита и да ги уживаат сите права од здравствената заштита, како и да можат да остварат пензиски стаж, односно кога ќе дојде време да стекнат право за пензија. Нема ниту една причина шивачките во текстилните фабрики кои примаат 12.000 денари плата или рударите да плаќаат здравсвено осигурување, а некој што преку хонорари остварува 50.000 денари да не плаќа здравствено осигурување. Мерката е правична и ќе овозможи сите на еднакво ниво доход и приход остварен, да плаќаат со еднаква стапка“, вели вицепремиерот Ставрески.

Според здружението на текстилни работници, мерката ќе помогне работниците да се заштитат.

„На сите такви договори ќе треба да се плаќаат придонеси. Се разбира фондовите ќе имаат позитивни резултати“, смета Ангел Димитров, Здружение на текстилни работници.

Плаќањето приоднеси за хонорар ќе важи за сите. Речиси сите европски земји од Германија до Чешка ја имаа имплементирано оваа мерка.

Дијана Ценевска