Последни подготовки за дочек на Новата година

Дедо Мраз не ја заобиколи македонската метропола. Во Скопје пристигна во 13 часот. Се спушти со јаже од Портата Македонија. На децата им донесе пакетчиња и играчи, на возрасните им посака најубави желби.

„Различни подароци, кој што сака, по некој лап- топ, по некој таблет, разни пакетчиња и други разни играчки“, рече Дедо Мраз.

Најрадосни беа децата. Студеното време не беше пречка да дојдат и да го видат најомилениот дедо.

На плоштадот вообичаена празнична глетка. Оние кои не стигнале да купат храна и облека за новогодишната ноќ, денеска ги прават последните подготовки.

„Се е подготвено, спремно... Фамилијарно ќе поминеме“, велат дел од граѓаните.

Празничната магија и снегот што падна ја поттикнаа и потрошувачката на потопла облека.

„Поголем е прометот последниве неколку денови“, вели вработен во продавница.

Традиционално, со музика по кафулињата и рестораните се подгрева новогодишната атмосфера.

„Од атмосферата тука се гледа како ќе помине и оваа година“, ијзави менаџер на кафуле.

За неколку часа ќе ја испратиме старата година и ќе ја дочекаме новата со нови желби и надежи.

Најдолгата ноќ во годината е пред нас. Ситно броиме до почетокот на 2015 година. Некои старата 2014-та ќе ја паметат по добри работи, други по лоши, но сите со позитивни мисли ќе ја дочекаат новата година. Кој може да остане рамнодушенна новогодишното расположение.

Сунчица Николовска