Владата ги кани професорите на дебата за измените на Законот за високо образование

Владата ги кани професорите в понеделник на дебата за измените на Законот за високо образование. Министерот за образование, Абдулаќим Адеми испратил покана до претседателот на Интеруниверзитетската конференција, Велимир Стојковски во која вели:

„Водејќи се од принципите на транспарентност и отвореност, како дел од дебатата за реформите кои се спроведуваат во високото образование во Република Македонија и кои во својата суштина го имаат обезбедувањето на повисок степен на знаења и вештини за студентите, дополнителен квалитет на работата на наставниот кадар и на образовниот процес, односно генерално подобрување на квалитетот на високото образование, Владата на Република Македонија и Министерството за образование и наука доставија покана до членовите на Интеруниверзитетската конференција за организирање на средба за размена на мислења и аргументи за квалитетно образложување на реформите и дебата за нив. Со цел обезбедување на застапеност на поголем број на мислења, цениме дека е од интерес за процесот, во рамките на делегацијата на Интеруниверзитетската конференција која ќе присуствува на средбата, покрај нејзините членови да биде овозможено и присуство по петмина професори кои со своите изнесени ставови во јавноста изразија забелешка и несогласување со реформите и по петмина професори кои дадоа поддршка на реформите во високото образование кои ги иницираше Владата во актуелниот период. Професорите ќе ги определи самата Интеруниверзитетска конференција“ се вели во поканата.

Планирано е средбата со владините претставници да се одржи во понеделник во хотелот  Александар Палас со почеток во 13:30 часот.