Околу половина милион Македонци во САД слават Божик

Православните христијани во Соединетите Американски Држави го слават Христовото раѓање-Божик со желби за мир во светот. Минатата година покажа дека на сите луѓе во светот им е потребен мир и затоа се молиме оваа 2015-та година да биде помирна, вели отец Џорџ од црквата „Свети Николас“ во Вашингтон.

„Мир во светот и добра волја меѓу луѓето! Тоа се добрите вести што на Земјата ги донесе нашиот спасител Исус Христос. Преку љубов Господ им даде спасение на луѓето и љубов ќе ни биде потребна во овој свет. Колку страдања доживеавме насекаде во светот во 2014-та, да даде Господ оваа година да биде помирна, попријатна и поудобна за луѓето на коишто ова им е потребно. Господ да ги благослови особено луѓето што помагаат на христијаните што страдаат!“, вели Џорџ Когно, свештеник во православната црква „Свети Николас“ во Вашингтон.

Иако Бадник и Божик се работни денови во Америка, верниците коишто можат ги посетуваат литургиите во православните цркви. Семејно почесто доаѓаат во недела на богослужба. И Македонците во Америка го слават Христовото раѓање исто како и во татковината.

„За Божиќ празнуваме исто како и во Македонија со сите обичаи и традиции покрај редовната богослужба имаме Света литургија. Бадник го прославуваме навечер како што се слави и во Македонија“, изјави отец Васил Манасиев- свештеник во Македонската православна црква „Свети Климент Охридски“ во Кливленд, Охајо.

Со поздравот „Христос се роди- навистина се роди“ во сите храмови на Македонската православна црква во Америка се слави Христовото раѓање-Божик.

Среќен Божик од екипата на Македонската телевизија во Вашингтон.

Ирина Гелевска, постојан дописник од Вашингтон за МРТ