Детроит славеше во Сан Антонио за шеста победа во серија

Кошаркарите на Детроит Пистонс играат како во најдобрите денови. Рано изутрина во трилер финиш ја остварија шестата победа по ред и тоа во “АТ&Т центарот“ на гостувањето кај бранителот на титулата Сан Антонио, со 105 : 104. Прецизниот шут на Брендон Џенингс на 7 секунди пред крајот придонесе за враќање на Детроит од негативата од 18 поени на полувремето, и за нивна најдолга победоносна серија во последните 6 сезони. Иако е само 13 во Источната конференција, тројниот НБА шампион почнува да размислува за “плеј оф“ завршницата од која се на 4 победи зад осморангиораниот Мајами. Најдобар кај победникот беше Андре Драмонд со 20 поени и 17 скокови, а кај домаќините Тим Данкан со 15 поени. Тоа беше 15 пораз сезонава за Сан Антонио за 7 позиција на Западот, со остварени 21 победа.

Со идентичен ефект во победи е и Феникс Санс, откако беше подобар на гостувањето кај Милкоки Бакс од 102 : 96. Осмата победа во последните 10 натпревари беше остварена во последниот период, кој гостите го добија со 31 : 24 предводени од Маркиф Морис со 26 поени и 10 скокови. Во редовите на Милвоки ист број на поени постигна Брендон Најт, но тоа беше недоволно да се избегне 18 пораз по кој Милвоки е шестопласиран во Источната конференција.  Најдобар во НБА и натаму е Голден Стејт со 27 – 5, а на Истокот лидер е Атланта на Перо Антиќ со 26 победи и 8 порази.