Сигурен пласман: Објавен тендер за македонско вино во Шведска

Монополот за продажба на алкохолни пијалаци во Шведска „Системболагет“ објави тендер за набавка на македонско црвено вино од сортата Вранец.

Оваа објава за набавка на црвено македонско вино значи сигурен пласман на 24.000 шишиња, односно 18.000 литри на македонски вранец. Виното ќе се продава во 130 продавници на „Системболагет” во период од 6 месеци почнувајќи од 15 септември 2015 година.

На овој тендер ќе учествуваат поголем дел македонските винарии преку шведски увозници кои по одржаните состаноци со нашиот економски промотер за Шведска Мирјана Наумоска изразија интерес за застапување на нашето вино на нивниот пазар. Ова е само почеток и се надеваме на објава на нов тендер во иднина и за бело вино, соопштуваат од Агенцијата за странски инвестиции и промоција на извозот.

За да се одржи позицијата „на рафт“потребна е успешна продажба во првите три месеци со цел и понатаму да го има виното, во спротивно ќе почне да се продава на листата за нарачки и нема да може да се купи во секој момент во продавниците на монополот.

Ова е голем успех за винската индустрија во Македонија која ќе добие одлична можност за презентација на шведскиот пазар кој важи за пазар со пребирлив и истенчен вкус во однос на виното, стои во соопштението на Агенцијата.