Заврши истрагата за кингерот

Заврши повторената истрага за падот на владиниот кингер, несреќа во која загина претседателот Борис Трајковски и делегацијата што го придружуваше на патувањето во Мостар во февруари 2004-та година. Деталите ќе бидат соопштени во Скопје непосредно пред одбележувањето на десетгодишниот помен од трагидијата. Ова за Македонската телевизија го соопшти главниот истражител Омер Кулиќ.

-Истрагата е завршена. Во тек е последните технички формалности. Најдоцна за еден месец тимот истражители ќе дојде во Скопје и на јавноста ќе и ги презентира фактите – изјави Омер Кулиќ.

Повтoрената истрага во најголем дел се разликува од првичната, според која, вината беше лоцирана кај пилотите што загинаа. Со симулација на автентичен лет на релација Скопје – Мостар, истражителите утврдија отстапување од процедурите за летање, а проблеми лоцирале и во инструментите за навигација.

Извештајот ќе биде доставен до обвинителството, кое по него ќе постапува и ќе утврдува дали има поединечна или колективна одговорност.

Новинар: Анита Димитријевска