Хрватите, сепак, пресилни!

Македонските ракометари го претрпеа првиот пораз на Светското првенство во Катар. Во дербито за лидерското место во групата „А“, нашиот национален состав загуби од Хрватска со 29-25, полувреме (15-14 за противникот).

Добро го отворивме натпреварот во салата во Духаил. Ги запревме бековите на „коцкестите“, имавме и неколку контри, бевме чекор порапред од нив. Создадовме и позитива од 9-5, го принудивме нивниот селектор Славко Голужа да бара тајм –аут, а по него Хрватите влегоа во серија и дојдоа до 9-9. Се одлепивме и на 13-11, но до паузата ривалот влезе во серија од 4-1 замина на одмор со гол предност. Во тој дел од средбата незапирлив беше Иван Чупиќ со седум од деветте гола на мечот. За него немавме решение, а откако во второто полувреме се разиграа Дувњак и Копљар беше тешко да се парира. Особено што се разбрани и голманот Алиловиќ кој дојде до 13 интервенции. Разликата постојано растеше, Хрватска стигна и до пет гола разлика (24-19) и веќе немаше можност за пресврт.

Лазаров со седум гола од 13 обиди беше најефикасен кај нас, Манасков, Стоилов, Миркуловски и Георгиевски посигнаа по три, Мојсовски два, а Никола Маркоски, Прибак и Филип Лазаров по еден гол. Голманот Борко Ристовски заврши со 13 одбрани.

Кај Хрвтска, Чупик со девет гола од десет шута беше најголема опасност. Дувњак даде пет, а Бичаниќ и Копљар по четири гола. Тоа беше доволно за триумф, за Хрватска четврти во четвртиот натпревар на Мундијалот. Македонија ќе се бори за второто место во Австрија в петок. Ние имаме бод повеќе, а тоа значи дека во меѓусебниот дуел во „Ал Сад“ арената нам ќе ни одговара и реми.