Државна поддршка за 23 нови филмови

По 5 децении и најмладите ќе се радуваат на новиот филм на Игор Иванов - Шеќерното дете.  Освен овој, со буџет од 134 милиони и 300 илјади денари, Агенцијата за филм ќе поддржи 23 нови филмови.

„Радува тоа што се прави прв игран филм наменет за децата, за најмладите. Се сеќавам дека во едно од првите интервјуа кога станав директор на Филмскиот фонд пред шест години, една од желбите што ги посакав е да имаме детски филмови и комедии“, изјави Дарко Башески, директор на Агенцијата за филм.

Оваа година шанса им даваат на младите дебитанти- режисери. Пари од државната каса се издвоени за 8 долгометражни играни филмови, 4 документарни, 6 краткометражни играни филмови, 2 документарни и 3 краткометражни анимирани филмови.

Еден милион евра е највисоката сума што може да се добие за еден игран филм. Од Агенцијата за филм велат дека при селекцијата се оценувале сценариото, режисерот и продуцентот. Биле земени предвид сите успеси на претходните филмови на меѓународните фестивали, наградите, како и нивната гледаност и дистрибуција во и надвор од македонија.

Ова е прв конкурс за филмови распишан од Агенцијата за филм, а оваа година ќе бидат распишани уште два.

Александра Перевска