Акција за помош на поплавените подрачја: Досега донирани три милиони денари

Речиси три милиони денари донирале граѓаните преку мобилните оператори, донација за загрозените во поплавените подрачја. Пакети со храна, средства за лична хигиена и за дезинфекција. 400-тини семејства од поплавените подрачја добија хуманитарна помош, што почна да стигнува и од земјите од регионот. На сметката на фондот за солидарност се собрани 150.000 денари.

И јавните личности се вклучуваат во акцијата за помош на поплавените.

„Добра музика, добра забава и хуманост. Музички ѕвезди се Тамара Тодевска, Некст Тајм, Наум Петрески и Каролина Гочева“, изјави Бојан Јовановски.

Хуманитарниот концерт ќе се одржи на 15-ти февруари во Универзалната сала, а парите од билетите со симболична цена од 250 денари ќе бидат наменети за потребите на жителите чиишто домови беа поплавени.

Јавните личности повикуваат - во акцијата да се вклучат и поголемите компании од државава.

И учениците ја покажаа хуманоста на дело. Од општинското основно училиште „Александар Македонски“ од Аеродром испратија пакети со чиста вода и средства за хигиена.

„Иницијативата беше пред се на родителите кои ја дадоа идејата. Ние ја поддржавме. Се влкучија и учениците и родителите и најблиското население. Акцијата трае веќе два дена“, изјави Слаѓана Настовска, директор на училиштето.

Помош се очекува да пристигне и од националните друштва на Црвениот крст од земјите во регионот, а парични средства на сметка на фондот најавија и македонците од Босна и Херцеговина, Србија, Словенија и Црна Гора.

Александра Перевска