Легализација: Бесплатни елаборати за 10 до 15 илјади лица

Рок за поднесување на изработените  елеборати до општините е декември годинава, и затоа е најдобро овие лица да побрзаат и да не го чекаат последниот момент. Од август лани , до Агенцијата за катастар на недвижности се поднесени 1.900 барања, а проценките на институциите се дека се работи за опфат на 10 до  15 илјади лица. 

„Сакаме да апелираме до лицата кои примаат социјална помош и постојана парична помош , како и лицата со ниски примања што побрзо да ја искористат оваа можност  и што побрзо да ги поднесат своите барања до Агенцијата за катастар на недвижности ,за да може државата бесплатно да им ги изработи елаборатите од страна на геодетските компании  и да можат тие што побрзо да ги поднесат елаборатите до општините за да можат да го легализираат својот имот  и да можат понатаму од него да остваруваат економски користи“, изјави портпаролот на Владата, Александар Ѓорѓиев.

Процедурата за поднесување барање е едноставна и бесплатна. Лицата треба да извадат потврда од центрите за социјална работа дека се корисници на таква помош и да ја однесат  во Агенцијата за катастар на недвижности.Се пополнува образец со кој се пријавува барањето ,а се  запишува и бројот на поднесокот на основната легализација.

Лицата со примања до 168.000 денари годишно на ниво на домаќинство,  треба да извадат потврда од Управата за јавни приходи  и по истата процедура да ја достават до катастарот.

Свето Николовски