Меси се врати со голови

Како вреден подарок спроти дербито  против Атлетико Мадрид навивачите на Барселона го доживуваат враќањето на Лионел Меси на теренот. Враќање  проследено со два гола во победата со 4:0 против Хетафе во Купот на Шпанија.

На 10 ноември минатата година Меси се повреди на натпреварот против Бетис. Точно 59 денови траеше  рехабилитацијата. Неговото влегување во игра во 64-та минута на местото на Андрес Иниеста е поздравено од 40 илјади гледачи на Ноу Камп. Во тој момент Барселона водеше против Хетафе со 2:0. Подготвен, „гладен“ за фудбал , Меси во свој стил  со голови го прослави враќањето на теренот.Во 89 минута тој зголеми  на 3:0, а во третата минута од судиското продолжение погодува уште еднаш за конечни 4:0.

В сабота на „Висенте Калдерон“  Барселона ќе му гостува на Атлетико Мадрид. Големо дерби  од 19 коло на двете водечки екипи на табелата , со кое  ќе биде заокружена првата половина од  Примера.