Поддршка за компаниите преку Фондот за иновации

Иновативни компании базирани на знаење и нови технологии, со повисок извозен потенцијал кои креираат работни места, можат да сметаат на поддршка на Фондот за иновации и технолошки развој. За првиот јавен повик за кофинансирање на проекти на мали бизниси се издвоени 600 илјади евра, а за сите  инструменти на располагање е скоро 4 пати поголем износ. Од Владата велат дека подобрувањето на конкурентноста преку знаење и иновации е клучно за економскиот развој на една земја.

„Фондот за иновации и технолошки развој располага со вкупно 4 инструменти и за сите нив оваа година се предвидени средства од вкупно 2 милиона 280 илјади евра“, изјави Владимир Пешевски, вицепремиер за економски прашања.

Се очекува преку првиот јавен повик да бидат поддржани 20-тина проекти на микро, мали и средни фирми. На огласот можат да се јават фирми не постари од 6 години, но и „старт ап“ компании , во доминантна сопственост на македонски граѓани.

„Износот што може да биде финансиран е најмногу до 30 илјади евра по проект, додека Фондот финансира околу 85% од вкупните трошоци за проектите“, нагласи Јасмина Поповска, директор на Фондот за иновации и технолошки развој.

Се очекува грантовите да придонесат за зголемување на капацитетите на македонските компании за апсорпција на нови знаења и нови технологии, како и поинтензивна соработка со странски компании и трансфер на технологии и знаења.

Бизнис заедницата посакува средствата да ги искористат токму иновативни компании кои создаваат производи со поголема додадена вредност .

Целта на Фондот е да ја зголеми  иновативноста во македонските компании и да се поттикне комерцијализацијална примена  на научно- истражувачки проекти од универзитетите преку формирање „спин оф“ претпријатија, како и трансфер на нови технологии.

Ќе може да се користи и техничка помош преку деловно- технолошки акцелератори.

Свето Николовски