Претседателот Иванов оствари средба со претседавачот на ОБСЕ, Дачиќ
18.02.2015 13:08
Како што соопшти Кабинетот на претседателот, на средбата Иванов истакнал дека Република Македонија високо ја цени улогата на ОБСЕ и поддршката што ја дава на земјата во повеќе сфери - владеење на правото, изборниот процес и законодавство, поддршка на области како што се полицијата и судството, унапредувањето на меѓуетничките односи и соживот...
Претседателот на Република Македонија, Ѓорге Иванов, денеска го прими Ивица Дачиќ, прв потпретседател на Владата и Министер за надворешни работи на Република Србија, кој во улога на претседавач на ОБСЕ престојува во работна посета на Република Македонија.
Како што соопшти Кабинетот на претседателот, на средбата Иванов истакнал дека Република Македонија високо ја цени улогата на ОБСЕ и поддршката што ја дава на земјата во повеќе сфери - владеење на правото, изборниот процес и законодавство, поддршка на области како што се полицијата и судството, унапредувањето на меѓуетничките односи и соживот.
Претседателот Иванов изразил задоволство од фактот што Република Србија, како земја сосед на Република Македонија, претседава со ОБСЕ, и во тој контекст изрази уверување дека српското претседателство на соодветен начин ќе ги изрази интересите на регионот.
Република Македонија, истакнал претседателот Иванов, целосно ја поддржува работата на организацијата и на српското претседателство.
Македонскиот претседател го запозна претседавачот на ОБСЕ, Дачиќ, дека за Република Македонија останува клучниот предизвик да се деблокира статус-кво состојбата во интеграциите, додавајќи дека евро-атлантските интеграции даваат дополнителна кохезивна сила во нашето општество.
На средбата се разговаралое за состојбите во поширокиот регион, како и за актуелните ангажмани на српското претседателство со ОБСЕ, особено во контекст на справувањето со феноменот на странски борци и насилниот екстремизам.
Српското претседавање со ОБСЕ, порачал претседателот Иванов, треба да се искористи за зајакнување на соработката во нашиот регион по прашањето за справување со насилниот екстремизам и странските борци, истакнувајќи дека се потребни соодветни проекти, во соработка со ОБСЕ, за соочување и превенција од овие закани.
Соговорниците размениле мислења и за кризата во Украина, како еден од актуелните приоритети на организацијата. Во таа насока, претседателот Иванов уште еднаш ја нагласи поддршката на напорите на ОБСЕ и на српското претседателство за изнаоѓање на дипломатско решение на проблемот.