Еколошкото друштво бара Јабланица да добие статус на Национален парк

Во Вевчани беше потпишан договор за мали грантови за планината Јабланица каде преку повеќе проекти треба да се поттикне еколошката свест и потенцијалот на природните ресурси на Јабланица, вклучувајќи ја природата, лековитите билки, заштитата на Балканскиот Рис но и искористувањето на целиот потенцијал на природата. Од македонското Еколошко друштво се надеваат дека нивната повеќе годишна работа ќе вроди со плод, а тоа е заштита и добивање статус на Национален парк.

„Ние со наши заложби, активности и истражувања имаме подговтено детална документација и ги имаме пријажано вредностите поради кои Јабланица треба да стане национален парк“, вели Ѓорѓе Иванов од македонското Еколошко друштво од Скопје.

Еколошките друштва упатија апел за здружување и заедничко делување за добивање статус на национален парк на планината Јабланица.

„Ги повикуваме сите локални невладини еколошки организации како и пошироко, зошто ние сме друштво кое постои 25 години, имаме доста сознанија, имаме стручен кадар и ни треба заедничко делување“, рече екологистот од Струга, Мате Гогоски.

Еден од проектите кои добија грант е и заштитата на шумските плодови и лековитите билки за кои дел од нив се од големо значење и ретки од својот вид.

„Јабланица има ретки и заштитени лековити билки меѓутоа со обој проект не може да се даде да се собираат бидејќи се заштитени и ги има многу малку. "Ѕвездица", "Линцурата" влегуваат во заштитени билки исто така бидејќи последните години многу се откопува и уништува“, вели фармацевтот Петар Мојсоски.

Во склоп на повеќегодишната работа на овие друштва беа доделени неколку помали грантови и тоа на планинарското друштво Закамен, еколошкото друштво Енхалон, на општина Вевчани и други.

Јованчо Наумоски