Ахмети со писмо до Хан- бара вклучување на меѓународната заедница за надминување на политичката ситуација

Лидерот на ДУИ, Али Ахмети испрати писмо до еврокомесарот Јоханес Хан во кое бара вклучување на меѓународната заедница за надминување на политичката ституација во земјава.

„Ситуацијата во земјата е загрижувачка и демократските капацитети на системот се ставени пред сериозен предизвик. Затоа, сметам дека итното и директно вклучување на Брисел, преку делегирање на политички тим, засилен со правни и истражни експерти, е неопходно“, вели Ахмети.

Според него, овој тим би ги осигурал сите засегнати страни дека процесот ќе биде кредибилен и непристрасен. Ахмети бара и интензивно вклучување на Брисел и Вашингтон во посредништвото меѓу Скопје и Атина за надминување на спорот за името.

„Овој спор мора да се затвори што е можно поскоро, но, решението не може да се постигне без интензивно вклучување на Брисел и Вашингтон во посредништво помеѓу Скопје и Атина. Нашите заеднички напори за да се постигне мир и да се изгради одржлива демократија во земјава не може да се сметаат како завршени без интеграцијата на Македонија во НАТО и почнување преговори за членство во Европската Унија“, му пишува Ахмети на Хан.