Расте побарувачката за нови станови

Побарувачката на нови станови расте по падот на цената на станбениот квадрат од 5,3 проценти во последниот квартал од 2014 година. Намалувањето го потврдија и најновите податоци на Народната банка. Цената за квадратен метар во атрактивните локации сега се движи од 795 - 1.100 евра вели првиот човек на Акционерското друштво за изградба.

„Гледаме економскиот аспект да биде оправдан, за да можат граѓаните да купат вакви станови, а тоа значи да има реална пазарна цена“, изјави Цветко Грозданов  -  АД ССДП.

И градежните компании се задоволни од продажбата. Кумулативната вредност на станбени објекти изградени во периодот од 2011-тата е за 72 отсто повисока, период  кога стартуваа и субвенционираните кредити.

„Ние имаме над 50 кредити кои се реализирани преку Купи куќа- купи стан, дури имаме и станбени делови кои ги правиме специјално по таа цена за да може да се вклопи во цената која е пропишана“, вели Зоран Азманов, Настел. 

Проектот „Купи куќа, купи стан“ ги поевтини станбените кредити. Се разгоре конкурентската битка меѓу банките. Банките се тркаат со атрактивни понуди, со камата до 3% во првите три години и до 7% годишна, променлива за останатиот период до отплата на кредитот.

„Порастот на исплатените станбени кредити во текот на 2014-та во однос на 2013-та инесува 12%. Свој удел во овој пораст има и зголемениот интерес на граѓаните за проектот Купи куќа- купи стан“, вели банкарот Драган Михајлов.

Проектот „Купи куќа, купи стан“ овозможи нов дом на околу 500 семејства.

Раст на побарувачката на станови, но и раст на станбените кредити потврдија податоците на НБРМ за четвртиот квартал од 2014-та година.

Дијана Ценевска