Против Белорусија со тројца дебитанти и со неколку повратници

Незадоволен од многумина на коишто им даде шанса во првите четири евроквалификациски средби, селекторот на македонската фудбалска репрезентација Бошко Ѓуровски направи драстични промени во изборот на играчи од одбраната и од нападот за дуелот со Белорусија наредниот петок во Скопје и за пријателскиот меч со Австралија три дена подоцна. Ќе ги нема Мојсов, Алиоски, Костовски, Јаховиќ, Стојков, Глигоров, аво комбинација се неколку повратници и тројца дебитанти во националниот тим.

„Се определив за стил на игра којшто бара многу движење и голема мобилност особено во нападот, во којшто овој пат ќе има ниски играчи. Лани се обидовме да играме со класични центарфорови, но не сум задоволен од нивните изданија. На ред е сега да пробаме со еден друг стил на игра“, изјави Ѓуровски на прес-конференцијата.

Пачовски, Наумовски и Богатинов се во голманското трио. Место во одбраната ќе бараат, според селекторот, поливалентните: Стефан Ристовски, Георгиевски, Кире Ристевски, Шиков, дебитантот Бојан Марковски и Дарко Велковски. Најширока е конкуренцијата за во средниот ред: Ибраими, Адеми, Положани, Трајковски, Ѓуровски, Хасани, Тодоровски, Радески, дебитантот Енис Барди од младата селекција и Србинот Урош Матиќ, ако добие сертификат од ФИФА. Главни напаѓачки адути ќе бидат Блажевски, Крсте Велкоски и Абдурахими.

„Верувам во овој тим, доста е подвижен, со играчи коишто овозможуваат длабочина во играта и бараат гол. Ако дојде Марио (Ѓуровски н.з) којшто може да даде добра топка, можеме да очекуваме добра офанзивна претстава“, вели селекторот.

Според Ѓуровски, дуелот со Белорусија е клучен за нашата репрезентативна иднина и многу подобро е кандидати за тимот да се шестмина играчи од домашното првенство коишто се во натпреварувачки ритам, отколку интернационалци коишто не играат во клубовите.