Иванов се сретна со Орав, Бејли и претставници на НАТО и ОБСЕ

Претседателот на Република Македонија, Ѓорге Иванов, денеска ги прими Џес Бејли, амбасадор на САД, Аиво Орав, шеф на делегацијата на Европската унија, Мариан Берц, претставник на мисијата на ОБСЕ и шефот на Канцеларијата за врски на НАТО, капетан Румен Радев.

На средбата беа разменети мислења и информации околу актуелната политичка состојба во Република Македонија, како и за состојбите и очекувањата во врска со членството на Република Македонија во ЕУ и во НАТО, соопшти Кабинетот на претседателот.

Претседателот Иванов истакна дека Република Македонија високо го цени партнерството и пријателството кои во континуитет се развиваат со САД, ЕУ, НАТО и ОБСЕ. Македонскиот претседател изрази благодарност до соговорниците за нивната посветеност кон надминување на предизвиците поврзани со актуелната политичка состојба во земјата, како и за поддршката која Република Македонија ја добива во насока на реализација на надворешно-политичките стратешки приоритети.

Претседателот Иванов потенцира дека евроатлантската интеграција на Република Македонија, не само што претставува највисока стратешка цел за земјата, туку истата има огромна кохезивна и трансформирачка моќ во македонското општество.

Дијалогот  останува единствениот начин преку кој се надминуваат сите предизвици и сите општествени фактори имаат одговорност за интересите на граѓаните и на државата, посочи претседателот Иванов.