Обука кај познат работодавач- можност за 1.000 невработени

Илјада невработени ќе имаат можност да  одат на обука кај познат работодавач. Од утре тече огласот на Агенцијата за вработување и Министерството за труд и социјална политика.

Можност за аплицирање имаат сите баратели на работа и приватните компании. За реализација на проектот се обезбедени 22.600.000 денари преку ИПА програмата, а фирмите што ќе ја спроведуваат обуката ќе добиваат надоместок до 25.000 денари.

„Невработените лица ќе имаат можност за обука на работно место во период од 3 месеци за што ќе добиваат по 6.200 денари месечно заедно со осигурување при повреда при работа“, изјави министерот за труд и социјална политика, Диме Спасов.

Обуките кај познати работодавачи покажуваат позитивни резултати и ги зголемуваат можностите за вработување вели Влатко Поповски, директорот на АВРМ.

„Доколку се работи за лице кое е под 29 годишна возраст и ја помине оваа обука, ќе може работодавачот да смета и на ослободување од придонеси во текот на првата година од вработувањето“, изјави директорот на АВРМ, Влатко Поповски.

Со оваа мерка досега се склучени 7.046 договори за обука, 5.034 се вработиле, а се уште работат околу 4.400 луѓе. Од утре ќе почне да функционира и електронската пошта за информирање на приватните компании за огласите што се објавуваат, а продолжува и известувањето преку Смс на активните баратели на работа за тековните мерки на Агенцијата за вработување.

Сунчица Николовска