Финишира изградбата на фабриката на Маркарт во Велес, најавени две нови инвестиции

Градбата на фабриката е во завршна фаза, дел од вработените се на обука. Маркарт се подготвува за финиширање на подготвките за работа и започнување на производство. Делови за автомобили ќе произведуваат планираните шестотини вработени. Реализацијата на сите активности на првиот странски инвеститор во Велес во планираното време е доказ за доброто бизнис опкружување кое го има општината .

„Нашата Општина е една од ретките која се стекна со меѓународен сертификат кој ги охрабрува странските инвеститори да вложуваат“, изјави Нада Јованова, економист.

Уште две германски компании ќе инвестираат во Велес. Едната е позната, ќе произведува медицински помагала и се вика „Јапоне“, а името на другата сеуште не се открива.

„За десетина дена ќе се слушне која е компанијата .Заедно со продадените зони во Речани 2, очекуваме да има околу 2.000 нови работни места во општина Велес, без да ја вброиме инвестицијата во Порцеланка“, вели Славчо Чадиев, градоначалник на Велес.

Покрај креирањето на нови работни места, овие инвестиции дирекно влијаат и врз економското работење на локалните компании.

„Ние веќе од мала, прераснавме во средна компанија. Странски инвеститор ни овозможи нови 40 вработувања. Сега имаме работа, сигурна наплата, имаме повеќе можности за менаџирање“, изјави Мирче Додевски, малостопанственик.

Намалување на бројот на невработени е потврда дека Велес фака чекор со соседните општини каде бројот на дирекни странски инвестиции е многу поголем.

Дијана Иванова