Лејкерс тонат, а Харден, Вестбрук и Леброн не знаат за доста

Синоќешната серија мечеви во НБА лигата, ја одбележа неславниот клупски рекорд на Лејкерс, кои што го загубија 56-от меч во една сезона, што е катастрофален учинок за најгламурозната кошаркарска франшиза преку океанот. Болниот пораз боли уште повеќе, затоа што е во градската пресметка со Клиперс (106:78), кои што ги начекаа своите 5 минути и во секоја прилика го бришат подот со вториот најтрофеен (16, 17 титули има Бостон) НБА колектив.

 

По осум месеци пауза, Пол Џорџ ги победи и скршеницата на ногата и докторите кои што му предвидуваа подолго отсуство, со 13 поени, 2 скока и 2 асистенции, за 15 минути на паркетот во еден од клучните триумфи за Пејсерс. Индијана останува во битка за доигрувањето со победата над Мајами, 112:89. Скола имаше 23 поени со 12 скокови, Хил додаде 19, а Мајлс 17 поени. За Хит, Вејд постигна 29 поени, а Горан Драгиќ имаше 15 поени со 5 додавања.

 

Џеј-Ар Смит исфрли 8 проектили, Ирвинг еднаш погоди од своето поле, Леброн реализира нов трипл-дабл со 20 поени, 10 скокови и со 12 асистенции – Кливленд не му дозволи на Чикаго да си замине со крената глава, во тесната победа 99:94.

 

Харден и натаму е во мртва трка со Вестбрук, двајцата имаат по 27,7 поени по натпревар, но Хјустон e екипата што се радуваше. Оклахома загуби дома со 112:115, откако Брадата постигна 41 поен, а патем имаше по 6 скокови и асистенции. На спротивната страна, првата виолина на Тандер сезонава, постигна поен помалку со 11 скокови и со 13 додавања.

 

 

Сан Антонио – Голден стејт 107:92

Њујорк – Филаделфија 101:91

Сакраменто – Јута 95:101