Дуелот на близнаците за Брук, Бруклин чекор поблиску до “плеј оф“

Вечерта кога вниманието на американската кошаркарска јавност беше насочена кон финалето на универзитетската НЦАА лигата се одигра само еден меч во НБА лигата. Екипата на Бруклин славеше над Портланд 106 : 96 благодарение на втората четвртина, која ја доби со 32 : 13. Мечот меѓу екипите од атлантскиот и пацифичкиот брег на земјата беше интересен и поради дуелот на браќата близнаци, центрите Лопез. Домаќинот Брук беше убедливо подобар со 32 поени и 9 скокови, наспроти Робин кој за Портланд запиша 9 поени и 4 скокови. Кај Бруклин одличен беше и бекот Вилијамс со 24 поени и 10 асистенции, додека најдобар во противничкиот табор и најефикасен на натпреварот беше Лилард со 36 поени.

Со својата 36 победа сезонава екипата на Бруклин се зацврсти на 7 позиција во Источната конференција, додека Портланд е 4 во Западната и сигурен учесник во постсезоната со 50 победи и 27 порази.