Клиничка патека за пациентите со малигни заболувања

Се скратува времето на чекање за пациентите со малигни заболувања. Преку таканаречената „Национална клиничка патека“ ќе се утврдуваат роковите за прегледи.

Целта со дефинирањето на клиничките патеки е да се утврди максималното време на чекање, односно од моментот на појава на индикација (суспекција) до извршување на првата дијагностичка процедура да не поминат повеќе од седум дена, а за добивање на хистопатолошки наод да не се чека подолго од 21 ден, рече министерот за здравство Никола Тодоров на денешната прес-конференција.

Со клиничките патеки е утвредно по добивање на позитивен наод да биде доставен или поставен на тумор-борд и целокупниот тек на лекувањето да се врши согласно медицина базирана на докази и меѓународните стандарди.

Министерот Тодоров прецизира дека станува збор за максимални рокови кои можат да бидат и пократки, но во одредена ситуација тумор-бордот може да го зголеми рокот доколку е потребно да се направат дополнителни испитувања, да се добие второ мислење или, пак, материјалите да се пратат во друга установа во земјава или странство.