Белградското дерби во сиот „сјај“
Црвена Звезда долго беше во кошаркарската сенка на Партизан. Но рулетот сезонава се сврте на црвено, па Звезда ќе игра во финалето на АБА лигата. Будуќност и Цедевита се надеваат на победа во мајсторката во нивната серија, а со тоа и за освојување на вториот билет за Евролигата.
Црвениот гигант ја заврши работата, го чека противникот од мајсторката в среда. Звезда конечно, по 21-на година го сруши Партизан во еден плеј-оф двобој, а Цедевита со втората победа по ред во Загреб се избори за мајсторка во Подгорица, против Будуќност.
Иако скандалите беа шлагот на белградското дерби – летаа запалки, сточлчиња и закани низ Пионир, кога кошаркарите на Звезда се собраа на централниот круг да го прослават триумфот, а низ ходниците се делеа шлаканици на сите страни, сепак кошарката победи. Далеку поквалитетната екипа се избори за финале и за Евролига следната сезона, во двобој што мораше да биде финална серија, но не беше поради лошиот финиш на Партизан во регуларниот дел на сезоната и пласманот на 4-та позиција на табелата.
Американците ја одведоа Звезда во финалето, со маестрална партија на Џенкинс низ сите 4 дуелли со црно-белите и на Вилијамс кој што заспа на стартот на серијата, но се разбуди во 28-та минута и до 36-та постигна 17 од вкупно 19-те поени во решавачката пресметка. Кратката клупа и заморот на реално 5 кошаркари што можеа да го понесат товарот, го чинеше Партизан пораз што боли многу повеќе и ќе боли многу подолго, од кој било друг. Црвена Звезда имаше долга сезона, го освои Купот на Србија, достојно се престави во Евролигата, се пласира во финалето на АБА лигата и го чека соочувањето со Партизан во домашното првенство.
Цедевита навидум имаше победа в џеб, но можеше да ја прокоцка во финишот на четварата средба, што за среќа на Репеша и неговите избраници кои што се повеќе демонстрираат дека немаат шампионски карактер, ќе се игра 5-ти натпревар. Прашањата се дали Хрватите може да победат три по ред и дали Црногорците, може да загубат исто толку во низа?
АБА плеј-офот продолжува в среда, во 18:30 кога слика од Подгорица ќе гледате на Собраниски, а за финалето нема да чекаме долго. Првите два меча, во Белград затоа што Звезда има предност домашен терен, се веќе викендов, исто така во живо на МТВ.