Во Валандово одбележан интернационалниот ден на болеста ФОП
ФОП е ретка, но и прогресивна болест од која боледуваат само 700-тини луѓе во целиот свет. Лек за неа нема, затоа најважно од се е на овие лица да им се дарува внимание и подршка во извршувањето на секојдневните потреби...
Да не се откажувате и секогаш да се борите и да бидете борци. Оваа силна порака ја кажува 16 годишната Викторија Пенова, која 14 години се бори со ретката болест ФОП, фибродисплазија осификанс прогресива од која боледуваат само 700 луѓе во светот. На Светскиот ден на оваа болест, Викторија вели дека ја продолжува битката.
„Секојпат таа реченица ми стои во глава и кога не е во ред секојпат си ја кажувам и одам во позитивно и може да направам многу работи“, вели Викторија Пенова.
Кај болните од ФОП мускулите се претвораат во коски и тие не можат да се движат нормално. Иако е врзана за количката, Викторија другарува со своите соученици, а и редовно ја посетува наставата.
„Другарка и сум подолго време. Заедно учиме од 5 одделение. Заедно се дружиме како и со сите, и помагаме“, вели Тамара Наумовска- соученичка на Викторија.
„Инаку Викторија е редовна ученичка, активна и дава се од себе“, додава Тахир Сељами- класен раководител на Викторија.
Свеченоста која втора година по ред ја подготвуваат гимназијалците од валандовската гимназија е обид да се сврти вниманието кон сите надлежни за оваа ретка болест.
„Еве и апел до институциите да се подигне јхавната свест з аовој вид луѓе дека сепак постојат и сигурно им треба поголема поддршка“, изјави Блаже Пенов, татко на Викторија.
Лек за ФОП не постои, а на Викторија и треба секојдневна поддршка во извршување на секојдневните обврски. Тука до неа е семејството, кое сплотено и помага да ги издвојува секојдневните победи.
Катерина Давчева