Почнува распределбата на трофеите

Со комплетно препуштена фаворитска улога на црвено-црните состави  во спортските центри Кале и Јане Сандански од утре до сабота ќе се бие битката за првите сезонски клупски трофеи во македонскиот ракомет.Полуфиналните натпревари се утре и в петок во СРЦ Кале.Завршниот турнир од купот на Македонија во машка конкуренција со првото полуфинале ќе го отворат  Металург и Пролет со меѓусебен дуел само три дена по нивното плеј-оф првенствено соочување во кое убедливо триумфира составот од Автокоманда со 32-20.

Многумина пред се поради ривалитетот посакуваа полуфинале меѓу Маталург и Зомимак,но ждрепката сакаше амбициозните струмичани утре да се соочат со големиот фаворит Вардар.Во првенствениот дуел сезонава Вардар се прошета низ Струмица со 38-27, па се освен црвено-црна победа би било рамно на сензација,особено што вардарци се пред можност по 10-ти јубилеен пат да се закитат со трофејот во купот во досегашните 23 изданија на најмасовното натпреварување.

Не би требало да има изненадувања ниту во женска конкуренција.Третопласираниот европски состав е огромен фаворит.Вардарки во полуфиналето в петок ќе играат со својот подмладок Вардар СЦБТ,а понеизвесна битка би требало да донесе полуфиналето меѓу ракометарките на Пелистер и Металург.Безмалку комплетната програма од завршните турнири во купот на Македонија ќе ја следиме и на македонската телевизија. Почнуваме утре од 17часот со полуфиналето меѓу Пролет и Металург и од 19 и 30 со натпреварот Вардар-Зомимак.