ФИФА ја тресе корупциски скандал

Корупциски скандал ја тресе Светската фудбалска федерација. Десетмина се уапсени во Цирих поради перење пари, рекетирање и измама, меѓу нив и неколку челници на ФИФА. Полициската акција е резултат на тригодишна истрага на ФБИ, а се разгледувале случаи стари и до 20 години. Скандалот ја разниша светската куќа на фудбалот само два дена пред изборот за нејзин претседател.

„Ова можеби не е најдобриот момент за ФИФА, но дефитивно го поздравуваме овој процес. Ќе соработуваме со главниот обвинител на Шавјцарија за целосно расветлување на случајот“, изјави Валтер Де Грегорио - портпарол на ФИФА.

На долгиот список уапсени се најдоа и претседателот на Фудбалската федерација на Костарика, претседателот на Конкакаф-зоната, членови на извршни одбори, лица одговорни за маркетинг. Претседателот на ФИФА, Сеп Блатер и генералниот секретар Џером Валке не се вмешани.

„Длабоко сум шокиран, како и целиот свет, а пред се сум многу тажен поради имиџот кој го добива фудбалот. Ако фактите докажат дека има корупција тоа ќе биде мошне сериозно. Би сакал швајцарската полиција и правниот систем случајот да го дотуркаат до крај“, изјави Фредерик Тириез – претседател на Француската фудбалска федерација.

По објавувањето на имињата на осомничените и приведените, се шпекулираше дека ќе има прегласување за организатори на наредните две првенства, сепак светските првенства во Русија и во Катар закажани за 2018-та и 2022-ра се сигурни и ќе се одржат.