Владата го решава проблемот на 20.000 осигуреници на ФЗОМ

Владата го решава проблемот на 20 илјади осигуреници на Фондот за здравствено осигурување. Со законското решение се врши ослободување од кривично гонење на лицата за кои постои основано сомнение дека сториле кривично дело употреба на исправа со невистинита содржина, односно на лицата кои што во постапката за пријавување во здравственото осигурување пред Фондот поднеле изјава со невистинита содржина за остварените приходи во претходната година.

Според  директорот на Фондот, Сашо Стефановски, предлогот е оправдан и исправен и се базира на социјалната правда и правичноста.

„Низ инстутционален дијалог, меѓу Министерството за здравство, ФЗОМ и Владата, утврдиме дека штетата која е направена од оваа категорија на луѓе е незначителна, односно во над 95% од случаите се работи за само неколку илајди денари штета на ФЗОМ, и од тие причини Владата се одзва на повикот на граѓаните и се одлучи за оваа мерка, која се разбира е многу поволна и ќе значи подобра социјална правда и мир за семејствата на над 20 илјади осигуреници на Фондот“, изјави Стефановски.

Предлог законот со кој се регулира оваа материја е веќе усвоен на владина седница, и тој веќе е испратен во Собранието на Република Македонија, потврдија од Владата.