Светска банка: Македонската економија со најголем раст во регионот

Според податоците на најновиот извештај на Светската банка „Глобални економски перспективи“, македонската економија ќе има најголем раст од земјите во регионот. Аналитичарите прогнозираат дека македонската економија годинава ќе има раст од 3,5 проценти, следната 3,8, а во 2017 година ќе достигне 4 отсто. 

Растот на БДП во Албанија е проектиран на 3 проценти за годинава, на 3,5 отсто следната и на 2 отсто во 2017 година, во БиХ растот се предвидува да изнесува 2 отсто годинава, 2,3 отсто наредната и 2,9 проценти во 2017 година. Во Бугарија за годинава е проектиран раст од 1,1 отсто, догодина 2 и во 2017 година е 2,7 отсто. Косово се предвидува да има раст од 3 отсто на БДП годинава, 3,5 следната година и 3,7 отсто во 2017 година, Црна Гора годинава ќе има раст од 3,4 отсто и 2,9 отсто следните две години и Хрватска годинава ќе има раст од 0,5 отсто, 1,2 отсто во 2016 и 1,6 отсто во 2017 година. Србија ќе биде единствена земја во регионот на која и се предвидува пад од 0,5 отсто за годинава и раст од 1,5 отсто следната и 2 отсто во 2017 година.

Во Извештајот за Македонија се наведува дека таа во изминатите години покажа подобри економски перформанси од соседите, благодарение на директните странски инвестиции во слободните економски зони и стимулациите од државата.

Се укажува дека зголемениот јавен долг  ќе го ограничи просторот за фискална поддршка на економскиот раст и дека банкарските системи на сите земји во регионот вклучувајќи ја и Македонија остануваат ранливи поради можното негативно влијание од кризата на грчките банки кои имаат свои удел во банките во државите од регионот.