АЕК ги информира патниците за пониските цени на роаминг услугите

Oд изутрината тимот на Агенцијата за електронски комуникации ги советуваше патниците кои излегуваа од земјава на граничниот премин Табановце. Делеа флаери на кои со слоганот „Без високи сметки во роамингот“ им порачаа на македонците да останат поврзани кога патуват надвор од државата. Според првиот човек на АЕК, Ордановски, ниските цени ќе овозможат телефоните да останат вклучени за време на целото патување, но и да се намали бројот на приговори по пристигнати високи сметки за роаминг.

„Да ги запознаеме и да ги упатиме во новите цени и како да ги користат. Друга акција што ја направивме во насока на намалувањето на цените во роаминг е тоа што сите граѓани кога патуваат, кога ќе направат 3.000 денари сметка добиваат СМС порака од операторот дека направиле толкава сметка и дали сакаат да продолжат со сервисот или не“, изјави првиот човек на АЕК, Роберт Ордановски.

Последното намалување на роаминг услугите ги симна цените за разговор на 17,9 денари за минута без ддв и 5,6 денари за СМС.  

Големото регионално намалување на цените во роаминг услугите стартуваше пред еден ден. Цените за разговор се намалени за 73%, а 90% за мобилниот интернет.

Покрај овие четири земји, спогодбата за роаминг се планира да се прошири и за Косово,Турција и Албанија.

Дијана Ценевска