Скопската Железничка станица добива нов модерен лик
Речиси 80 насто од реконструкцијата е завршена. Се работи на централната контролна соба и на билетарниците. Скопската железничка станица до ноември треба да добие нов модерен лик – рекоа надлежните по увидот во градежните работи проектирани на 2,4 милиони евра...
Македонија добива нова слика во железничката инфраструктура. За околу четири месеци целосно ќе биде обновена Железничката станица во Скопје. Ефективно се работи на реконструкција на пероните, чекалниците, лифтовите, санитарните јазли. Проектот за модернизацијата на скопската Железничка станица чини 2,4 милиони евра- 85 проценти од средствата се од ИПА фондот, а преостанатите 15 насто се од државната каса. До наредната година нов лик треба добијат и железничките постојки на Коридорот 10.
„Ефективно се работи на објектот, постојано има дополнителни работници и очекувам дека за три-четири месеци комплетно ќе биде рехабилитирана Железничката станица“, изјави министерот за транспорт и врски, Владо Мисајловски.
Според првиот човек на Македонски железници – Инфраструктура, работите се во завршна фаза, а патниците ќе добијат современа железничка станица и подобри услови во железничкиот сообраќај.
„Два перона се целосно направени, се работи на третиот перон, лифтовите се 90 проценти завршени. Дел од санитарните јазли, на северната страна, се 100 проценти завршени, а во другите делови 90 проценти. Се работи и на електричните и климатизациските инсталации кои се завршени околу 80 проценти “, вели Ирфан Асани, директор на МЖ-Инфраструктура.
Со инвестицискиот бум во железничката инфраструктура се подобрува квалитетот на железничкиот транспорт. Обезбедени се нови патнички возови, нови товарни вагони, се обновуваат и пругите.
Сунчица Николоска