До година ново зголемување на социјалната помош

Ќе продолжи да се зголемува паричната социјална помош за ранливите категории, кои со јунската исплата добија повеќе средства на своите сметки – најави вицепремиерот Ставрески при денешната посета на Дневниот центар за деца со церебрална парализа.

Владата ја исплати зголемената социјална и постојана парична помош за социјално ранливите категории за 10 проценти и зголемениот надомест за семејствата кои згрижуваат деца без родители за 25 проценти. Зголемената социјална помош е исплатена пред десетина дена, а вчера се исплатени средствата за постојаната парична помош и за згрижувачките семејства.

Вчера е извршена исплатата на зголемениот надомест за 25 проценти за семејства што згрижуваат деца без родители, која претходно изнесуваше од 6.000 до 8.000 денари, а сега ќе изнесува од 8.000 до 10 илјади денари. Истовремено  почнавме и со исплатата на зголемената социјална и постојана парична помош за околу 35.000 кроисници за 10 проценти, изјави министерот за труд и социјална политика, Диме Спасов.

Вицепремиерот Ставрески истакна дека Владата и понтаму ќе продолжи со поддршката на социјално ранливите категории во сите сфери и дека наредната година ќе има ново зголемување на социјалната и постојата парична помош.

Потенцира дека Владата води постојано грижа и за останатите ранливи категории при тоа потсети на поевтинувањето на лековите, обезбедувањето бесплатно здравство за лица без приходи, за пензионерите и слично.

Социјалната компонентата е силно изразена во рамки на Буџетот и ние и со овогодинешниот и со буџетите за наредните години ќе обезбедиме доволно средства за сите социјално ранливи категории, рече Ставрески.