Грција го усвои вториот пакет на мерки

По жестока расправа, грчкиот парламент го усвои вториот сет реформи што ги бараат кредиторите. Изненадување беше тоа што позитивно гласаше и екс министерот за финансии Варуфакис, кој се изјасни „против“ претходниот пакет мерки.

„230 пратеници гласаа „да“, 63 гласаа „не“ и петмина се воздржани. Законот е прифатен од мнозинството“, изјави Алексис Митропулос, заменик претседател на Парламентот.

Усвоени беа новите закони за забрзување на долгите судски процеси и примена на европската директива за банките. Новиот министер за финансии Цакалотос вети дека до крајот на годината банките ќе добијат свеж капитал, а премиерот Ципрас вети дека нема да престане да се бори за социјална правда.

За време на седницата, противници и поддржувачи на реформите протестираа пред парламентот.