Згрижени 200 семејства, апел за помош на настраданите во Тетовско

200 семејства од најпогодените подрачја од Тетовско ќе бидат згрижени. На оние кои ќе останат во домовите, најпотребни им се храна, вода, хигиенска средства и ќебиња. Помошта може да се предаде во пунктот на Црвениот крст во Момин Поток, а отворени се и сметки за донации.

„Денеска Црвениот крст е на терен. По направената итна проценка во вчерашниот ден ќе бидат згрижени околу 200 семејства, претежно во Шипковица, Голема и Мала Речица, затоа што проценките врлат дека тие се најзагрозени од последиците од невремето“, изјави генералниот секретар на Црвениот крст на Македонија, Саит Саити.

На терен се и медицински екипи од здравствените домови од Гостивар и Скопје, како и тимови на итната медицинска помош. Во Тетовско се и специјалистите по хигиена и епидемиолозите. Се проверува водоводната и канализационата мрежа. По добиените анализи на најпогодените места ќе се врши дезифенкција.

„Денеска ќе знаеме точно колкав е обемот и каде точно ќе треба да се изврши дезинфекција и со кои средства, но првин треба да се исчисти теренот во соработка со останатите институции, па после ние да извршиме дезинфекција на регионо“, изјави заменик-министерот за здравство, Јовица Андовски.

Помош за Тетово до Црвениот Крст на Македонија понудиле и од оваа организација од Албанија и Бугарија.

Викторија Милевска