Странски консултанти за зголемена конкурентност

Нови странски експерти ќе работат на зголемување на конкурентноста на домашните компании, на оптимизирање на нивните трошоци и на зајакнување на производствените и маркетиншките процеси. Мисиите на консултаните започнуваат на крајот на месецов, согласно потребите на фирмите.

„Сега сме во фаза на интензивна комуникација со нашите партнери од Германија, Холандија, Швајцарија, Австрија и ЕБОР, со цел утврдување на конкуретниот експерт кој би пристигнал во земјава и би помогнал во работењето на компаниите, согласно нивните потреби“, изјави портпаролот на Владата, Александар Ѓорѓиев.

На вториот јавен повик што го објави Владата се пријавиле 64 домашни компании, мали и средни претпријатија од повеќе сектори и од различни градови.   Бараат помош за воведување нова технологија во производството, за подобрување на промоцијата и продажбата, во делот на менаџирањето и деловната политика, човечките ресурси.

„Динамиката на процесот ќе ја утврдуваме со самите компании и сметаме дека со овој процес ќе се подобрат перфрормансите на компании“, додаде Ѓорѓиев.

Предност имаат компаниите со голем потенцијал за раст и за зголемување на бројот на вработени, чиишто менаџерите оцениле дека за ова да го постигнат им е потребна странска експертска помош.

Анализите на ЕБОР покажуваат дека во над 70% од компаниите кои побарале бизнис совет, продажбата се зголемила за 60 отсто. 

Мартин Пушевски